Monday, 12 April 2021

மித்ராவின் வழி மலேசிய இந்தியர் திட்டவரைவு மேம்படுத்தப்படும்- டத்தோ ஹலிமா

கோலாலம்பூர்-

மலேசிய இந்தியர்கள் சமூக- பொருளாதார மேம்படுத்தும் வகையில் ‘மலேசிய இந்தியர் திட்டவரைவு’ (Malaysian Indian Blueprint) மேம்படுத்துவதில் அரசாங்கம் கவனம் செலுத்தும் என்று ஒற்றுமை துறை அமைச்சர் டத்தோ ஹலிமா முகமட் சித்திக் தெரிவித்தார்.

பி40 பிரிவைச் சேர்ந்த இந்தியர்களை உள்ளடக்கி மனித மூலதனம், தொழில்முனைவோர் மேம்பாடு, சமூக நலன் திட்டங்கள் ஆகிய மூன்று கூறுகளை உள்ளடக்கி இத்திட்டம் மேம்படுத்தப்படும்,

மலேசிய இந்தியர் திட்டவரைவு 2017இல் அறிமுகப்படுத்தப்பட்ட போதிலும் அதன் இலக்கை முழுமையாக அடையவில்லை. மலேசிய இந்தியர் சமூக உருமாற்றப் பிரிவான ‘மித்ரா’ மூலம் அதனை மேம்படுத்தும் நடவடிக்கை துரிதப்படுத்தப்படும்.

மித்ராவுக்கென ஆண்டுதோறும் 100 மில்லியன் வெள்ளி நிதியை அரசாங்கம் ஒதுக்கீடு செய்கிறது. அதன் மூலம் இந்திய சமூகத்தை மேம்படுத்துவதற்கான நடவடிக்கைகள் மேற்கொள்ளப்படும் என்று அவர் சொன்னார்.

மலேசிய இந்தியர்களுக்கான திட்டவரைவை முன்னாள் பிரதமர் டத்தோஶ்ரீ நஜிப் துன் ரசாம் 2017இல் அறிமுகம் செய்து வைத்தார் என்பது குறிப்பிடத்தக்கது.

ஆடியோ, வீடியோ சார்ந்த விவகாரங்களில் அஸ்மின் அலி திறமை வாய்ந்தவர்- டத்தோஶ்ரீ அன்வார்

கோலாலம்பூர்-

ஆடியோ, வீடியோ சார்ந்த விவகாரங்களில் டத்தோஶ்ரீ அஸ்மின் அலி திறமை வாய்ந்தவர் என்று பிகேஆர் கட்சியின் தேசியத் தலைவர் டத்தோஶ்ரீ அன்வார் இப்ராஹிம் சாடினார்.

அம்னோ தலைவர் டத்தோஶ்ரீ ஸாயிட் ஹமிடி, டத்தோஶ்ரீ அன்வார் இப்ராஹிம் தொடர்புடைய ஆடியோ பதிவு குறித்து கருத்துரைத்த அஸ்மின் அலி அது அன்வாரின் குரல்தான் என்று கூறினார்.

இதன் தொடர்பில் கருத்து கூறிய அன்வார், அது அவருடைய கருத்து, ஆடியோ, வீடியோ சார்ந்த விவகாரங்களின் அவர் திறமை வாய்ந்தவர் என்று அன்வார் குறிப்பிட்டார்.

2019ஆம் ஆண்டில் டத்தோஶ்ரீ அஸ்மின் அலியை உட்படுத்தி ஓரினப் புணர்ச்சி வீடியோ வெளியாகி பரபரப்பை உண்டாக்கியது அரசியல் வட்டாரத்தில் பரபரப்பை ஏற்படுத்தியது,.


Sunday, 11 April 2021

துரோகிகள் சூழ்ந்துள்ள கூட்டணியில் எவ்வாறு இணைய முடியும்?- டத்தோஶ்ரீ அன்வார்

 காஜாங்-

துரோகிகளின் கூட்டம் நிறைந்திருப்பதாலேயே பதவிகள் வழங்கப்பட்டும் தேசிய கூட்டணியில் பக்காத்தான் ஹராப்பான் இணையவில்லை என்று பிகேஆர் கட்சியின் தேசியத் தலைவர் டத்தோஶ்ரீ அன்வார் இப்ராஹிம் தெரிவித்தார்.

சொந்த கட்சிக்குள்ளேயே இருந்த தரோகிகளின் நடவடிக்கையாலேயே புதிய அரசாங்கம் அமைந்தது. கடந்தாண்டு பிப்ரவரி மாதம் முன்னெடுக்கப்பட்ட ‘ஷெராட்டான் நடவடிக்கை’யால்  பக்காத்தான் ஹராப்பான் ஆட்சி 22 மாதத்தில் கவிழந்தது.

பக்காத்தான் ஹராப்பான் கூட்டணியில் இருந்து பெர்சத்து விலகிய பின்னர் பிகேஆர் கட்சியின் துணைத் தலைவராக இருந்த டத்தோஶ்ரீ அஸ்மின் அலி, அவரது அணியினர் அம்னோ , பாஸ் கட்சியுடன் இணைந்து பெரிக்காத்தான் நேஷனல் எனும் தேசிய கூட்டணி அரசாங்கத்தை அமைத்தனர்.

சொந்த கட்சியைச் சேர்ந்த துரோகிகளாலேயே நாங்கள் வீழ்த்தப்பட்ட நிலையில் துரோகிகள் அங்கம் வகிக்கும் அரசில் வெறும் பதவிக்காக எவ்வாறு கூட்டணி அமைக்க முடியும்? என்று டத்தோஶ்ரீ அன்வார் கேள்வி எழுப்பினார்.



தடுப்பூசியை செலுத்திக் கொள்ளும் தொழிலாளர்களுக்கு முதலாளிகள் விடுமுறை வழங்க வேண்டும்- டத்தோஶ்ரீ சரவணன்

கோலாலம்பூர்-

கோவிட்-19 தடுப்பூசியை போட்டுக் கொள்வதற்கு ஏதுவாக தொழிலாளர்களுக்கு அந்நாளில் சம்பந்தப்பட்ட முதலாளிமார்கள் விடுமுறை வழங்குவதற்கு மனிதவள அமைச்சு அனுமதி வழங்கியுள்ளது.

கோவிட்-19 வைரஸ் தொற்று பாதிப்பிலிருந்து மலேசியர்கள் விடுபடுவதற்கு ஏதுவாக தடுப்பூசி திட்டம் முன்னெடுக்கப்பட்டு வருகிறது. அவ்வகையில் தொழிலாளர்கள் தடுப்பூசியை போட்டுக் கொள்ள முதலாளிமார்கள் எவ்வித பாரபட்சமுமின்றி விடுமுறை வழங்க வேண்டும் என்று மனிதவள அமைச்சர் டத்தோஶ்ரீ எம்.சரவணன் குறிப்பிட்டார்.

தடுப்பூசியை ஒரே நாளில் அனைவரும் செலுத்திக் கொள்ள முடியாது என்பதால் அதற்காக சிறப்பு விடுமுறை அரசாங்கம் அறிவிக்க முடியாது. அதனாலேயே தடுப்பூசியை செலுத்திக் கொள்பவர்களுக்கு சம்பந்தப்பட்ட முதலாளிமார்கள் விடுமுறை வழங்க வேண்டும் என்று அவர் குறிப்பிட்டார்

வெ.11 லட்சம் மதிப்பில் சுங்கை சிப்புட் மஇகாவுக்கு புதிய கட்டடம்

லிங்கா

சுங்கை சிப்புட்-

மூன்று மாடிகளைக் கொண்ட புதிய கட்டடத்தை சுங்கை சிப்புட் மஇகா சொந்தமாக்கியுள்ளது.


மஇகாவின் தேசியத் தலைவர் டான்ஶ்ரீ எஸ்.ஏ.விக்னேஸ்வரன் தலைமையில் இங்குள்ள எம்எச் ஹோட்டல் வளாகத்தில் உள்ள மூன்று மாடி கட்டடம் வெ.11 லட்சம் வெள்ளி செலவில் வாங்கப்பட்டுள்ளது.

இது குறித்து பேசிய டான்ஶ்ரீ விக்னேஸ்வரன்,சுங்கை சிப்புட் மஇகா  தற்போதுள்ள தேசிய முன்னணி அலுவலகத்தில் செயல்பட்டு வருகிறது. இது தாமான் துன் சம்பந்தன் குடியிருப்பில் முதன்மை சாலையிலிருந்து சற்று உள்ளே இருப்பதால் அது மக்களுக்கு சிரமமாக இருப்பதை உணர்ந்துள்ளோம்.

அதன் அடிப்படையிலேயே மக்களுக்கு இலகுவாக இருக்க வேண்டும் என்பதால் இந்த கட்டடம் மஇகாவுக்கு வாங்கப்பட்டுள்ளது.

இந்த கட்டடத்தின் மதிப்பு வெ.15 லட்சம் ஆகும். டான்ஶ்ரீ கோ.இராஜு மேற்கொண்ட நடவடிக்கையில் 11 லட்சம் வெள்ளி மதிப்பில் இக்கட்டடம் சொந்தமாக்கப்பட்டுள்ளது என்று அவர் மேலும் சொன்னார்.

கூடிய விரைவில் இந்த புதிய கட்டடத்தில் சுங்கை சிப்புட் மஇகா செயல்படும் என்று டான்ஶ்ரீ விக்னேஸ்வரன் குறிப்பிட்டார்.

இன்று இந்த புதிய கட்டடத்தின் சாவியை டான்ஶ்ரீ விக்னேஸ்வரன் பெற்றுக் கொண்டார். இந்நிகவில் டான்ஶ்ரீ இராஜு, டிஎன்பி வாரிய இயக்குனர் டத்தோ ரவிசந்திரன், கோலகங்சார் நகராண்மைக் கழக உறுப்பினர் நேருஜி, கெடா மாநில மஇகா முன்னாள் இளைஞர் பிரிவுத் தலைவர் நந்தகுமார் ஆகியோர் உடனிருந்தனர்.

Saturday, 10 April 2021

மஇகா தேமுவில் தான் உள்ளது- டான்ஸ்ரீ விக்னேஸ்வரன்

லிங்கா 

சுங்கை சிப்புட்-

மஇகா  இன்னமும் தேசிய முன்னணியில் தான் தொடர்ந்து இருக்கிறது என்று அதன் தேசியத் தலைவர் டான்ஸ்ரீ எஸ்.ஏ.விக்னேஸ்வரன் கூறினார்.

நேற்று சுங்கை சிப்புட் ம.இ.கா. தொகுதி அலுவலகத்தில் பேறு குறைந்தவர்களுக்கும் மாணவர்களுக்கும் நிதியுதவிக்கான காசோலை வழங்கும் நிகழ்ச்சிக்குப் பிறகு செய்தியாளர்களிடம் பேசுகையில் அவர் இவ்வாறு சொன்னார்.

ம.இ.கா. மாநாட்டை  மலேசியப் பிரதமர் டான்ஸ்ரீ முகைதீன் யாசின் திறந்துவைத்தது தொடர்பில் பல ஊகங்கள் எழுந்துள்ளன.  பொதுவாக ம.இ.கா. பேராளர் மாநாட்டுக்கு பிரதமரை அழைப்பது வழக்கம். மேலும், இந்தியர்களின் பிரச்சினைகள் குறித்து பிரதமர் என்ன திட்டங்கள் வைத்துள்ளார் என்பதை அறிந்துகொள்ள இது ஒரு வாய்ப்பாகவும்  அமையும்.

தவிர, ம.இ.கா. வுக்கு ஓர் அமைச்சர் பதவியும் பிரதமர் வழங்கியுள்ளார். அதற்கு நன்றி தெரிவிக்கும் வகையிலும் அவரை மாநாட்டுக்கு அழைத்தோம். எனவே, தேசிய முன்னணியில் ம.இ.கா. தொடர்வதில் எந்தச் சிக்கலும் இல்லை என்றும் டான்ஸ்ரீ விக்னேஸ்வரன் தெளிவுபடுத்தினார்.

நேற்று பாடாங் ரெங்காஸில் நடைபெற்ற நிகழ்ச்சியொன்றில் கலந்துகொண்ட நாடாளுமன்ற உறுப்பினர் டத்தோஸ்ரீ நாஸ்ரி அஜிஸ், ம.இ.கா. தேசிய முன்னணியில் தொடர்ந்து இருப்பதில் மகிழ்ச்சியே. எனினும், அவர்கள் வெளியேற முடிவு செய்தாலும் அம்னோ தனித்து நின்று வெற்றிபெறும் ஆற்றலைப் பெற்றுள்ளது என்றும் அவர் கூறினார்.

Friday, 9 April 2021

இந்திய பாலர் பள்ளி ஆசிரியர்களின் 4 மாத சம்பளம் தேக்கம்- மித்ரா கவனிக்குமா?

ரா.தங்கமணி

கோலாலம்பூர்-

இந்தியர் சார்ந்த பொது நிகழ்வுகளுக்கும் பொது இயக்கங்களுக்கும் மானியத்தை வாரி வழங்கி கொண்டிருக்கும் மித்ரா எனப்படும் மலேசிய இந்தியர் சமூக உருமாற்றப் பிரிவு, நாட்டில் செயல்பட்டு கொண்டிருக்கும் இந்திய பாலர் பள்ளிகளைச் சேர்ந்த ஆசிரியர்களுக்கு 4 மாத கால சம்பளத்தை வழங்காமல் இழுபறி நிலையை ஏற்படுத்தியுள்ளதாக அறியப்படுகிறது.

நாட்டிலுள்ள தமிழ்ப்பள்ளிகளுக்கு மாணவர்களைச் சேர்க்கும் விதமாக 215 பாலர் பள்ளிகள் செயல்பட்டுக் கொண்டிருக்கின்றன. இதில் 400க்கும் அதிகமான பட்டதாரி ஆசிரியர்கள் பணிபுரிந்து வரும் இவர்களுக்கு வழங்கப்பட வேண்டிய மாதாந்திர சம்பளத்தை கொடுப்பதில் ‘மித்ரா’  இழுபறியை நிலையை தொடர்ந்து கொண்டிருக்கிறது.

பி40 பிரிவைச் சேர்ந்த குடும்பங்களின் பிள்ளைகளுக்கு பாலர் கல்வியை  போதிக்கும் இந்த பாலர் பள்ளிகள் தொடர்ந்து செயல்பட முன்னாள் பிரதமர் டத்தோஶ்ரீ நஜிப் துன் ரசாக் தொடக்கி வைத்த ‘செடிக்’ அமைப்பின்  வழி மானியம் வழங்கப்பட்டு வந்தது.

இந்த பாலர்கள் பள்ளிகளை 5 அரசு சார்பற்ற இயக்கங்கள் வழி நடத்தி வருகின்ற நிலையில் அவற்றின் மூலம் மானியம் ஒதுக்கீடு செய்யப்பட்டு வந்தது. அந்த இயக்கங்களின் வழியே ஆசிரியர்களுக்கு மாதச் சம்பளம் வழங்கப்பட்டு வந்தது.

2018இல் நிகழ்ந்த ஆட்சி மாற்றத்திற்குப் பின்னர் செடிக் அமைப்பு ‘மித்ரா’ என பெயர் மாற்றம் கண்டதோடு முன்னாள் அமைச்சர் பொன்.வேதமூர்த்தி ஒற்றுமை துறை அமைச்சின் கீழ் மித்ராவை ஒரு பிரிவாக மாற்றியமைத்தார்.

முன்பு ஆசிரியர்களின் சம்பளப் பிரச்சினை தலை தூக்கியபோது பல மாதப் போராட்ட்திற்கு பின்னர் சுமூக தீர்வு காணப்பட்டது. ஆனால் இப்போது மீண்டும் ஆசிரியர்களின் சம்பளப் பிரச்சினை தலை எடுத்துள்ளது என்று பெயர் குறிப்பிட விரும்பாத பாதிக்கப்பட்ட ஒருவர் ‘பாரதம்’ இணைய ஊடகத்திடம் வேதனையை பகிர்ந்துக் கொண்டார்.

பொது இயக்கங்களின் நிகழ்ச்சிகளுக்கும் பொது இயக்கங்களுக்கும் மானியத்தை வாரி வழங்கும் ‘மித்ரா’ இந்திய பலர் பள்ளி விவகாத்தில் மட்டும் மெளனம் காப்பது?

4 மாத கால சம்பளம் இல்லாமல் பணியாற்றி வரும் பட்டதாரி ஆசிரியர்களுக்கும் ஒரு குடும்பமும் வயிறும் உண்டு என்பதை ‘மித்ரா’  அறிந்து வைத்துள்ளதா?

சம்பளம் இல்லாமலும் இந்திய சமுதாயத்தின் விருட்சங்களான சிறார்களின் கல்வி எவ்விதத்திலும் பாதிக்கப்பட்டு விடக்கூடாது என்பதற்காக பணியாற்றும் ஆசிரியர்களின் கண்ணீருக்கு தீர்வு எப்போது கிடைக்கும்?


பக்காத்தான் ஹரப்பான் கூட்டணியின் பிரதமர் வேட்பாளர் டத்தோஸ்ரீ அன்வார்

 கோலாலம்பூர் 

நாட்டின் 15ஆவது பொதுத் தேர்தலில் பக்காத்தான் ஹரப்பான் கூட்டணியின் பிரதமர் வேட்பாளராக பிகேஆர் கட்சியின் தேசியத் தலைவர் டத்தோஸ்ரீ அன்வார் இப்ராஹிம் அறிவிக்கப்பட்டுள்ளார். 

பிகேஆர், ஜசெக, அமானா ஆகிய கட்சிகள் டத்தோஸ்ரீ அன்வாரை ஏகமனதாக பிரதமர் வேட்பாளராக அங்கீகாரித்துள்ளதாக கூறப்படுகிறது. 

அதோடு, பக்காத்தான் ஹராப்பான் கூட்டணியில் இணைந்து பணியாற்ற பிற தரப்பினருக்கும் வாய்ப்பு வழங்க முடிவெடுக்கபட்டுள்ளதாக டத்தோஸ்ரீ அன்வார் கூறினார்

Thursday, 8 April 2021

தமிழ்மொழி பண்பாட்டு விவகாரங்களில் எங்களுக்கும் பங்களிப்பு உண்டு- தமிழ் முசுலிம் அமைப்பு

ஷா ஆலாம்-

தமிழர்கள் பல சமயங்களில் இருக்கிறார்கள். தமிழர்கள் தழுவிய சமயங்களில் ஒன்று தான் இசுலாம். இசுலாம் சமயத்தைத் தழுவினாலும் தாய்மொழியால் நாங்களும் தமிழர்கள் தான். தமிழ் மொழி, பண்பாட்டு விவகாரங்களில் எங்களின் பங்களிப்பு உண்டு எனத் தமிழ் முசுலிம் இயக்கத்தினர் தெரிவித்துள்ளனர்.


பல்வேறு சமயத்தால் வேறுபட்டிருப்பதால் ஒரு சிலரால் சில பண்பாட்டுக் கூறுகளை முழுதாகக் கடைபிடிக்க முடியாமல் போனது வேதனைக்குரிய ஒன்றாகும். 

இருந்த போதிலும், தமிழ் நாட்டிலும் மலேசியாவிலும் பெரும்பான்மையானத் தமிழ் முசுலிம் சமூகத்தைச் சார்ந்தவர்கள் மொழி பண்பாட்டு விவகாரங்களை முறையாகவும் சரியாகவும் கட்டிக் காத்து வருகிறார்கள் என்பதை மறந்து விடக் கூடாது என தமிழ் முசுலிம் பாரம்பரிய கலாச்சார மொழி மேம்பாட்டுச் சங்கத்தைச் சேர்ந்த ஹாஜி பஷிர் அகமது தெரிவித்தார். 

தொடக்கக் காலம் தொட்டே பல இலக்கியங்களையும் தமிழ் முசுலிம் சமூகத்தினர் படைத்து வந்திருப்பதும் குறிப்பிடத்தக்கது. 

மேலும், பேச்சு வழக்கில், “நீங்கள் தமிழர்கள்” என மற்றச் சமயத் தமிழர்களைக் குறிக்கும்போது “அப்படியென்றால் நாம் யார்?” என்ற கேள்வியும் எழுகிறது. இப்படி பேசுவதைத் தமிழ் முசுலிம் சமூகத்தினர் முதலில் குறைக்க வேண்டும் என்பது தமது கருத்தாகிறது என ஹாஜி பஷிர் அகமது குறிப்பிட்டார். 

மேலும், தமிழ் மொழி, பண்பாட்டு விவகாரங்கள் தொடர்பாக தற்போது அமைக்கப்பட்டிருக்கும் தமிழ் முசுலிம் பாரம்பரிய கலாச்சார மொழி மேம்பாட்டுச் சங்கம் எனும் தளத்தில் இருந்து சேவையாற்ற இருப்பதாகவும் அவர் மேலும் சொன்னார்.

மஇகாவுக்கு மாற்றாக மலேசிய மக்கள் சக்தி கட்சி- டத்தோஶ்ரீ தனேந்திரன் நம்பிக்கை

கோலாலம்பூர்-

வரும் 15ஆவது பொதுத் தேர்தலில் தேசிய முன்னணி கூட்டணியில் இந்திய சமுதாயத்தின் குரலாக மலேசிய மக்கள் சக்தி கட்சி விளங்க முடியும் என்று அக்கட்சியின் தேசியத் தலைவர் டத்தோஶ்ரீ ஆர்.எஸ்,தனேந்திரன் தெரிவித்தார்.

60 ஆண்டுகால தேசிய முன்னணியின் உறுப்புக் கட்சியாக விளங்கி வரும் மஇகாவின் இடத்தை எங்களால் நிரப்ப முடியும் என்று நம்பிக்கை தெரிவித்த அவர், பெரிக்காத்தான் நேஷனல் கூட்டணியில் இணையும் மஇகாவின்  முடிவை  நாங்கள் தடுக்க முடியாது. அதே வேளையில் இதில் எங்களுக்கு பொறாமை ஏதும் இல்லை.

தேசிய முன்னணிக்கு விசுவாசமாக இருந்து வரும் மலேசிய மக்கள் சக்தி கட்சி, எந்தவொரு சூழலிலும் விலகிட மாட்டோம் என்று கூறிய டத்தோஶ்ரீ தனேந்திரன், மஇகாவின் இடத்தை முழுமையாக பூர்த்தி செய்து விடுவோமா என்பது தெரியவில்லை, ஆனால் இந்திய சமுதாயத்தின் குரலாக தேமு கூட்டணியில் நிச்சயம் விளங்கும்வோம் எனறு அவர் நம்பிக்கை தெரிவித்தார்.

Wednesday, 7 April 2021

'I-SEED' திட்டத்தை அதிகாரப்பூர்வமாக தொடக்கி வைத்தார் கணபதிராவ்

 ரா. தங்கமணி 

ஷா ஆலம்-

சிலாங்கூர் மாநிலத்தில் வர்த்தகம் மேற்கொள்ளும் சிறு வணிகர்கள், வர்த்தகர்களுக்கு உதவும் நோக்கில் சிலாங்கூர் மாநில அரசு 'ஐ-சீட்' (I-SEED) திட்டத்தை தொடங்கியுள்ளது.

சிலாங்கூர் மாநில ஆட்சிக்குழு உறுப்பினர் வீ.கணபதிராவ் இன்று அத்திட்டத்தை அதிகாரப்பூர்வமாக தொடக்கி வைத்தார்.

10 லட்சம் வெள்ளி நிதி ஒதுக்கீட்டில் தொடங்கப்பட்டுள்ள இத்திட்டம் சிலாங்கூர் மாநிலத்தில் வர்த்தகம் மேற்கோள்வோர் தங்களது வர்த்தகத்தை மேம்படுத்தி கொள்ள வழிகாட்டுகிறது.

இத்திட்டத்தில் பதிந்து கொள்வோருக்கு வேண்டிய வர்த்தகப் பொருட்களை வழங்குவதே இத்திட்டத்தின் நோக்கமாகும் என்று கணபதிராவ் குறிப்பிட்டார்.

இத்திட்டத்திற்கு விண்ணப்பிக்கப்படுவோர் நேர்காணல் செய்யப்பட்டு தகுதி வாய்ந்தவர்களுக்கு மட்டுமே பொருளுதவிகள் வழங்கப்படும்.

வரும் ஜூலை,ஆகஸ்ட் மாதங்களுக்குள் தகுதி வாய்ந்தவர்களுக்கு உதவிப் பொருட்கள் வழங்குவதற்கான நடவடிக்கை முன்னெடுக்கப்படும் என்று கூறிய கணபதிராவ், 6 அதிகாரிகளைக் கொண்டு 'I-SEED' பிரிவு செயல்படுத்தப்படுகிறது என்று சொன்னார்.

இன்று நடைபெற்ற அதிகாரப்பூர்வ தொடக்க நிகழ்வில்  MBI. தலைமைச் செயல் அதிகாரி ஹஜா நோரித்தா,  I-SEED தலைமை ஒருங்கிணைப்பாளர் டிக்காம் லூர்டஸ், ஒருங்கிணைப்பு அதிகாரிகள் திருமதி கண்மணி, தினேஷ், குகநாதன், கமலநாதன், திருமதி விக்னேஷ்,  இந்திய கிராமத் தலைவர்கள் (KKI), ஆகியோர் கலந்து கொண்டனர்.

அன்வார் பிரதமராக ஆதரவு கடிதம் கொடுத்தது யார்- கேள்வி எழுப்ப முடியுமா? டான்ஸ்ரீ விக்னேஸ்வரன் காட்டம்

கோலாலம்பூர்-

பிகேஆர் கட்சி தலைவர் டத்தோஸ்ரீ அன்வார் இப்ராஹிம் பிரதமராக நியமனம் செய்யப்பட மாமன்னருக்கு ஆதரவு கடிதம் வழங்கியது தொடர்பில் அம்னோ தலைவர் டத்தோஸ்ரீ ஸாயிட் ஹமிடியிடம் கேள்வி எழுப்புங்கள் என்று அம்னோ உச்சமன்ற உறுப்பினர் புவாட் ஸர்காசிக்கு மஇகா தேசியத் தலைவர் டான்ஸ்ரீ எஸ்.ஏ.விக்னேஸ்வரன் சவால் விடுத்தார்.

தேசிய முன்னணியை விட்டு பிற கட்சிகளுடன் இணைந்து மஇகா செயலாற்றுவதை கேள்வி எழுப்புவதை விடுத்து இவ்விவகாரம் தொடர்பில் ஸாயிட்டுக்கு நெருக்குதல் கொடுங்கள்.

தேசிய முன்னணியில் கலந்தாலோசிக்காமல் எதிர்க்கட்சியைச் சேர்ந்த ஒரு தலைவரை ஆதரிக்கும் முடிவை யார் எடுத்தது? என்பதற்கு பதிலளிக்க ஹாயிட்டை நெருக்குங்கள் என்று கூறியுள்ள டான்ஸ்ரீ விக்னேஸ்வரன் தனது தலைவரை கேள்வி கேட்கும் துணிச்சல் அவருக்கு (புவாட்) இருக்கிறதா? என்று வினவினார்.

'இந்த முடிவு யாருடையது என்று கேளுங்கள்?, தேமு, அம்னோவில் முடிவு எடுக்கப்பட்டதா? இவ்விரண்டிலும் முடிவு எடுக்கவில்லை என்றால்  முடிவு எடுத்தது யார்? என்பது குறித்து கட்சி தலைவரிடம் கேள்வி எழுப்ப முடியுமா? என்று டான்ஸ்ரீ விக்னேஸ்வரன் வினவினார்.

Tuesday, 6 April 2021

லோரியில் கூடுதல் பளு; உற்பத்தி நிறுவனங்களே முழு பொறுப்பு- டத்தோ சத்யபாலா- டத்தோ சிவநேசன்

ஈப்போ-

லோரியில் கூடுதல் பளுவை ஏற்றுவதால் சாலை போக்குவரத்துத் துறையினர் விதிக்கும் அபராதங்களுக்கு சில லோரி ஓட்டுனர் லோரி நிறுவனங்களை குறை கூறுகின்றனர். ஆனால் உண்மையில் உற்பத்தி தொழிற்சாலை நிறுவனங்களே அதிக பளு ஏற்றுவதற்கு பொறுப்பாளியாகின்றன என்று போக்குவரத்து நிறுவனத்தை நடத்தி வரும் டத்தோ சத்யபாலா தெரிவித்தார்.

டத்தோ சத்யபாலா      டத்தோ சிவநேசன்

கனரக வாகன நிறுவனத்தை நடத்தி வரும் தன்னிடம் 25 லோரிகள் இருக்கின்றன. ஆயினும் குறிப்பிட்ட நிறுவனங்கள் விதிக்கும்  கட்டுப்பாடுகளாலேயே லோரியில் அதிகமான பளு ஏற்றப்படுகின்றன. 

லோரியில் கூடுதல் பளுவை ஏற்றுவதால் அபராதம் பெறும் ஓட்டுனர்கள் பின்னாளில் பெரும் சிரமத்திற்கு ஆளாவதை நாங்கள் உணர்கிறோம். ஆனால் கூடுதல் பளுவை ஏற்ற முடியாது என்று சொன்னால் சம்பந்தப்பட்ட நிறுவனங்கள் வேறு போக்குவரத்து நிறுவனத்தை நாடுகின்றன. இதனால் எங்களுக்கு பெரும் நஷ்டம் ஏற்படுகிறது என்றார் டத்தோ சத்யபாலா.

கோப்புப்படம் 


அபராதம் பெறுவதிலிருந்து ஓட்டுனர்கள் விடுபட வேண்டுமென்றால் சட்டத்திட்டங்களை பின்பற்றும் தொழிற்சாலையில் வேலைக்கு சேருங்கள். மேலும் கூடுதல் பளுவை ஏற்றச் சொன்னால் அதனை ஓட்டுனர்கள் மறுக்க  வேண்டும் என்று டத்தோ சிவநேசன் கூறினார்.

இப்பிரச்சினைக்கு முழுமையான தீர்வு காணப்பட லாபத்திற்காக கூடுதல் ஏற்றுவதை நிறுவனங்கள் தவிர்க்க வேண்டும். இல்லையேல் லோரிகளில் அதிக பளுவை ஏற்றும் நிறுவனங்களுக்கு அபராதம் விதிக்க வேண்டும். அதை விடுத்து லோரி ஓட்டுனர்களுக்கு மட்டும் அபராதம் விதிக்கப்படுவது ஏற்புடையதாகாது என்று அவர் மேலும் சொன்னார்.

தள்ளுவண்டியின் மூலம் வாக்களிக்கும் உரிமையை நிறைவேற்றிய மாயநெரி

சென்னை-

இன்று நடைபெறும் தமிழ்நாடு தேர்தலை முன்னிட்டு அரசியல் பிரமுகர்களும் திரை பிரபலங்களும் தங்களது ஜனநாயக கடமையை நிறைவேற்ற வாக்களித்து வருகின்றனர்.

அவ்வகையில் ரயில் விபத்தொன்றில் இரு கால்களையும் இழந்த நரிக்குறவர் வம்சத்தைச் சேர்ந்த கே.மாயநெரி குப்புசாமி தள்ளுவண்டியின்  மூலம் தேவராயநெரி வாக்களிக்கும் மையத்திற்கு வந்து  தனது வாக்களிக்கும் உரிமையை நிறைவேற்றியுள்ளார்.

1961இல் நிகழ்ந்த ரயில் விபத்தில் இவர் தனது இரு கால்களையும் இழந்தார் என்பது குறிப்பிடத்தக்கது.

உண்மையை அறியாமல் உளற வேண்டாம் வேதமூர்த்தி- வீரன் சாடல்

 ரா.தங்கமணி

கோலாலம்பூர்-

இந்து ஆலயங்கள் தொடர்பில் மஇகாவின் தேசியத் தலைவர் டான்ஶ்ரீ எஸ்.ஏ.விக்னேஸ்வரன் கூறிய கருத்துகளின் உண்மைத்தன்மையை அறியாமல் பொன்.வேதமூர்த்தி உளறக்கூடாது என்று மஇகா மத்திய செயலவை உறுப்பினர் மு.வீரன் குறிப்பிட்டார்.

இந்நாட்டிலுள்ள இந்தியர்கள் மட்டுமல்லாது அவர்களில் கலாச்சாரமாகவும் அடையாளமாகவும் விளங்குகின்ற ஆலயங்கள், தமிழ்ப்பள்ளிகளுக்கு என்றும் அரணாக இருப்பது  மஇகா மட்டுமே.

அப்படிப்பட்ட ஆலயங்களில் தொடர்கதையாக நீண்டுக் கொண்டிருக்கும் ஆலய உடைப்பு சம்பவம் வருங்கால தலைமுறையினரிடமும் தொடரப்படக்கூடாது எனும் நோக்கில் கூறப்பட்ட ஒரு கருத்தை திரித்து கூறுவது வேதமூர்த்திக்கு மட்டுமே கைவந்த கலையாகும்.

மஇகாவின் 75ஆவது மாநாட்டில் கொள்கையுரை ஆற்றிய டான்ஶ்ரீ விக்னேஸ்வரன் இந்து ஆலயங்கள் உடைபடுவது குறித்து தமது கருத்தை பதிவு செய்கையில், கெடா மாநிலத்தில் ஆலயங்க்ள் உடைபட்ட விவகாரத்தில் பாஸ் கட்சியின் செயலை கண்டித்ததோடு வருங்காலத்தில் இதுபோன்ற சம்பவங்கள் தொடரக்கூடாது என்றால் புறம்போக்கு நிலங்களில் ஆலயங்கள் நிர்மாணிக்கப்படுவது நிறுத்தப்பட வேண்டும் என்றுதான் கூறினார்.

புறம்போக்கு நிலங்களிலும் தனியார் நிலத்திலும் ஆலயங்களை கட்டுவதால் அந்நிலம் மீட்கப்படும்போது பல்வேறு பிரச்சினைகள் எழுகின்றன. அதனாலேயே ஆலயங்களை கட்டுவதற்கு முன்னர் நிலத்தை சொந்தமாக்கிக் கொள்ளுங்கள். சொந்த நிலத்தில் ஆலயத்தை கட்டினால் இதுபோன்ற பிரச்சினைகள் எழாது என்ற கருத்தை தான் டான்ஶ்ரீ விக்னேஸ்வரன் முன்வைத்தாரே தவிர இருக்கும் ஆலயங்களை உடைக்க வேண்டும் என்று ஒருபோதும் கூறியதில்லை.

கம்போங் ஜாவா ஆலய உடைப்புச் சம்பவத்தை சாதமாக்கி ஹிண்ட்ராஃப் போராட்டத்தின் வழி இந்திய சமுதாயத்தில் கிடைக்கப்பெற்ற புகழை வைத்து தேசிய முன்னணி அரசில் துணை அமைச்சராகவும் பக்காத்தான் ஹராப்பான் ஆட்சியில் முழு அமைச்சராகவும் பதவி வகித்த வேதமூர்த்தி நாட்டிலுள்ள ஆலயங்கள் பாதுகாக்கப்பட எடுத்த நடவடிக்கைகள் என்ன? என்பதை பட்டியலிட்டு காட்ட முடியுமா?

நாட்டிலுள்ள ஆலயங்களின் வளர்ச்சிக்காக மஇகா செய்த சேவையில் 10 விழுக்காட்டை கூட பூர்த்தி செய்யாத வேதமூர்த்தி, டான்ஶ்ரீ விக்னேஸ்வரன் கூறிய கருத்து புரியவில்லை என்றால் வாய் மூடி கிடக்க வேண்டும். அதை விடுத்து நானும் இந்திய சமுதாயத்தில் ஒரு ஹீரோ தான் என்ற நினைப்பின் கண்டதை உளறி கொட்டக்கூடாது. 

உங்களது ஆட்டமெல்லாம் முடிந்து விட்டது, மஇகாவின் சேவை என்ன? என்பதையும் உங்களின் சேவை என்ன? என்பதை கடந்த 22 மாத கால பக்காத்தான் ஹராப்பான் ஆட்சியில் இந்திய சமூகம் நன்றாகவே பார்த்து விட்டது என்று வீரன் காட்டமாக கூறினார்.


Monday, 5 April 2021

தேமு கூட்டம் ரத்து

கோலாலம்பூர்-

இன்றிரவு நடக்கவிருந்த தேசிய முன்னணி உயர்மட்ட குழு கூட்டம் ஒத்திவைக்கப்பட்டுள்ளது. 

தேசிய முன்னணியை அங்கம் பெற்றுள்ள கட்சிகளின் தலைவர்கள் இக்கூட்டத்தில் கலந்து கொள்ளாததே இக்கூட்டம் ரத்து செய்யப்படுவதற்கான காரணம் என்று சில தகவல்கள் கூறுகின்றன. 

தேசிய முன்னணியில் தற்போது அம்னோ,  மசீச,  மஇகா,  பிபிஆர்எஸ்  ஆகிய கட்சிகளே உள்ளன.

Saturday, 3 April 2021

வெற்றி வாய்ப்பில்லாத தொகுதிகளில் மஇகா? டான்ஸ்ரீ விக்னேஸ்வரன் ஆதங்கம்

ரா. தங்கமணி 

கிள்ளான் -

தேசிய முன்னணியின் உறுப்புக் கட்சியாக உள்ள  மஇகாவுக்கு வெற்றி வாய்ப்பு இல்லாத தொகுதிகளை ஒதுக்குவதை நிறுத்தி விட்டு, வெற்றி வாய்ப்புள்ள தொகுதிகளில் களம் கண்டால் மஇகாவும் தனது வெற்றியை உறுதி செய்யும் என்று மஇகாவின் தேசியத் தலைவர் டான்ஶ்ரீ எஸ்.ஏ.விக்னேஸ்வரன் தனது ஆதங்கத்தை வெளிப்படுத்தினார்.

ஆட்சி அதிகாரத்தை கைப்பற்ற வேண்டும் என்பதற்காக வெற்றி வாய்ப்புள்ள தொகுதிகளை எல்லாம் அம்னோ கைப்பற்றி விட்டு, வெற்றி வாய்ப்பில்லாத நாடாளுமன்ற, சட்டமன்றத் தொகுதிகளை ஒதுக்கினால் மஇகா எவ்வாறு வெற்றி பெற முடியும்?

வெற்றி வாய்ப்புள்ள தொகுதிகளில் மஇகா போட்டியிட்டிருந்தால் இந்நேரம் நாடாளுமன்றத்திலும் மாநில சட்டமன்றத்திலும் மஇகாவின் பிரதிநிதிகள் அதிகமாகவே இருந்திருப்பர் என்று அவர் மேலும் சொன்னார்.


ஆலய நிர்மாணிப்பு முன்னதாக நிலத்தை சொந்தமாக்குங்கள்

கோ. பத்மஜோதி 

கிள்ளான்,

நாட்டில் விஸ்வரூபம்  எடுத்துகொண்டிருக்கும் ஆலயப்  பிரச்சினைகளுக்கு நிரந்திர  தீர்வுக் காணப்பட  வேண்டுமென்றால், ஆலயத்தை நிர்மாணிப்பதற்கு முன்னதாக சம்பந்தப்பட்ட தரப்பினர் அந்நிலத்தை சொந்தமாக்கிக் கொள்ள வேண்டும்  என்று மஇகாவின் தேசியத் தலைவர் டான்ஸ்ரீ எஸ்.ஏ.விக்னேஸ்வரன் கேட்டுக் கொண்டார்.

தனியார் நிலத்தில் ஆலயம் நிர்மாணிக்கப்படுவதும் பின்னர் அது உடைபடும்போது மஇகா  என்ன செய்துக் கொண்டிருக்கிறது என சாடுவதும் வாடிக்கையாகி விட்டது.

ஆலயங்கள் உடைபடும் சம்பவங்களை தவிர்க்க தனியார் நிலத்தில் ஆலயம் நிர்மாணிக்கப்படுவது  தவிர்க்கப்பட வேண்டும். 

நாடு  சுதந்திரம் அடக்குவதற்கு முன்னர் ஆலயங்கள் நிர்மாணிக்கப்பட்ட சூழல் வேறு.  ஆனால் இன்றைய காலத்திலும் அனுமதியின்றி ஆலயங்கள் நிர்மாணிக்கப்படுவது நமது சமயத்தை நாமே இழிவுபடுத்துவது  போலாகும். 

எனவே,  ஆலய உடைப்பு பிரச்சினைக்கு நிரந்தர தீர்வு காணப்படும் வகையில் இந்திய சமுதாயத்தை பிரதிநிதிக்கும் அனைத்துத் தரப்பினருடனும் கலந்துரையாடல் நடத்தப்படும் என்று மஇகா திட்டமிட்டுள்ளதாக மஇகாவின் 74ஆவது பொதுப் பேரவையின் கொள்கை உரையின் போது டான்ஸ்ரீ விக்னேஸ்வரன் இவ்வாறு கூறினார்.

தேமுவில் மஇகா; உறவு நீடிக்க வேண்டும்-டத்தோஶ்ரீ ஸாயிட்

ரா.தங்கமணி 

கிள்ளான் -

1947இல் தொடங்கப்பட்ட மஇகா இன்றுவரையிலும் அம்னோ, தேசிய முன்னணியுடன் தொடர்ந்து கொண்டிருக்கும்  உறவு இனிவரும் காலங்களிலும் நீடிக்க வேண்டும் என்று அம்னோ தலைவர் டத்தோஶ்ரீ ஸாயிட் ஹமிடி குறிப்பிட்டார்.

10 தேசியத் தலைவர்களை கடந்து வந்துள்ள மஇகா இக்கட்டான காலகட்டத்திலும் அம்னோவுடன் நட்புறவை பாராட்டி வந்துள்ளது. 2018 பொதுத் தேர்தலில் ஆட்சி அதிகாரத்தை இழந்த நிலையிலும் தேமுவின் உறுப்புக் கட்சியாக தொடர்ந்து நீடிக்கும் நிலைப்பாட்டை மஇகா கொண்டிருந்தது. 

இதே சூழலில் வரும் 15ஆவது பொதுத் தேர்தலையும் எதிர்கொண்டு ஒரு வலுவாக கூட்டணியாக மீண்டும் ஆட்சி அதிகாரத்தை கைப்பற்றும் இலக்கை வென்று காட்டுவோம் என்று மஇகாவின் 74ஆவது பொதுப் பேரவையை இயங்கலை வழி தொடக்கி வைத்த தேசிய முன்னணியின் தலைவருமான டத்தோஶ்ரீ ஸாயிட்  ஹமிடி குறிப்பிட்டார்.


வென்றால் சமூகச் சேவை; இல்லையேல் கட்சி சேவை- டான்ஸ்ரீ விக்னேஸ்வரன்

ரா.தங்கமணி 

கிள்ளான் -

வரும் பொதுத் தேர்தலில் மக்களின் பேராதரவோடு பல நாடாளுமன்ற, சட்டமன்றத் தொகுதிகளை மஇகா வென்றால் சமூகச் சேவையில் ஈடுபடும், இல்லையேல் கட்சி உறுப்பினர்களுக்கான சேவையில் மஇகா முனைப்பு காட்டும் என்று அதன் தேசியத் தலைவர் டான்ஶ்ரீ எஸ்.ஏ.விக்னேஸ்வரன் குறிப்பிட்டார்.

7 லட்சம் உறுப்பினர்களைக் கொண்டுள்ள மஇகா ஒரு வலுவான கட்சியாகவே திகழ்கிறது. இந்திய சமுதாயத்தின் பிரதிநிதியாக மஇகா மட்டுமே திகழ முடியும் என்ற சூழலில் இந்திய சமுதாயத்திற்கான சேவையை மஇகா என்றுமே புறக்கணித்தது இல்லை.

இன்னும் ஆக்ககரமான திட்டங்களை இந்திய சமுதாயத்திற்கு நிறைவேற்ற மஇகாவுக்கு அரசியல் பலமும் அதிகாரமும் தேவைபடுகிறது. இதற்கு இந்திய சமுதாயம் மஇகாவுக்கு ஆதரவாக துணை நிற்க வேண்டும். 

இந்திய சமுதாயத்தின் பேராதரவோடு  வரும் பொதுத் தேர்தலில் மஇகா அதிகமான நாடாளுமன்ற, சட்டமன்றத் தொகுதிகளை வென்றால் சமூகச் சேவையில் ஈடுபடுவோம். இல்லையேல் கட்சி உறுப்பினர்களுக்கு மட்டுமே சேவையாற்றும் கட்சியாக மஇகா உருமாறலாம். கட்சியின் வளர்ச்சிக்கு பாடுபட்ட உறுப்பினர்களை மஇகா ஒருபோதும் மறந்து விடாது என்று டான்ஶ்ரீ விக்னேஸ்வரன் குறிப்பிட்டார்.

மஇகாவின் ஆதரவில் பெருமிதம் கொள்கிறேன்- பிரதமர்

கோ.பத்மஜோதி 

கிள்ளான் -

தேசிய முன்னணியின் கூட்டணியில் இடம்பெற்றிருந்தாலும் பெரிக்காத்தான் நேஷனல் அரசாங்கத்திற்கான ஆதரவு தொடரும் என்ற மஇகாவின் கூற்றில் பெருமிதம் கொள்வதாக பிரதமர் டான்ஶ்ரீ முஹிடின் யாசின் தெரிவித்தார்.

நாட்டின் தற்போதைய சூழலில் நிலைத்தன்மையற்ற அரசியல் போக்கு நிலவுகிறது. இருந்தபோதிலும் நாட்டு மக்கள்  நலனில் அக்கறை கொண்டு ஒரு புரிந்துணர்வு அடிப்படையில்  அரசாங்கத்துடன் இணைந்து செயலாற்றும் போக்கு வரவேற்கத்தக்கதாகும்.

பெர்சத்துவுடனான உறவை முறித்துக் கொள்வதாக தேமுவின் முதன்மை கட்சியான அம்னோ முடிவு எடுத்துள்ள போதிலும் மஇகாவின் ஆதரவு தமது தலைமையிலான பெரிக்காத்தான் நேஷனல் அரசாங்கத்திற்கு பலமாக அமைந்துள்ளதோடு இந்த ஆதரவு என்றும் தொடரப்பட வேண்டும் என்று  மஇகாவின் 74ஆவது பொதுப் பேரவையில் இயங்கலை வழி சிறப்புரையாற்றிய டான்ஶ்ரீ முஹிடின் யாசின் இவ்வாறு கூறினார். 


கேமரன் மலை தொகுதியை மஇகா ஒருபோதும் இழக்காது- டான்ஸ்ரீ விக்னேஸ்வரன்

கோ.பத்மஜோதி

கிள்ளான், 

மஇகாவின் பாரம்பரிய தொகுதியான கேமரன் மலை தொகுதி அம்னோவுக்கு தாரை வார்க்கப்பட்டுள்ளதே தவிர மஇகா  அதனை ஒருபோதும் இழந்து விடவில்லை என்று மஇகாவின் தேசியத் தலைவர் டான்ஶ்ரீ எஸ்.ஏ.விக்னேஸ்வரன் திட்டவட்டமாக தெரிவித்தார்.

கேமரன் மலை தொகுதி தற்போது அம்னோவிற்கு தாரை வார்க்கப்பட்டுள்ளதே தவிர அத்தொகுதியை நிரந்திரமாக  இழந்துவிடவில்லை; இழக்கவும் மாட்டோம். 

கேமரன் மலை தொகுதி மஇகாவின் பாரம்பரிய தொகுதியாகும். மஇகாவின் உதவித் தலைவர் டத்தோ சி.சிவராஜ் கடந்த 14ஆம் ஆண்டு பொதுத் தேர்தலில் கேமரன் மலை தொகுதியில் போட்டியிட்டு வெற்றி பெற்றார். ஆயினும் நீதிமன்றத்தில் தொடரப்பட்ட வழக்கின்  தீர்ப்பில் சிவராஜ் நாடாளுமன்ற உறுப்பினர் தகுதியை இழந்ததோடு அங்கு இடைத்தேர்தலும் நடத்தப்பட்டது.

அந்த இடைத்தேர்தலில் தேசிய முன்னணியின் எண்ணிக்கையை நாடாளுமன்றத்தில் அதிகரிக்கும் நோக்கில் அம்னோ கேட்டுக் கொண்டதற்கிணங்க மஇகா அத்தொகுதியை அவர்களுக்கு தாரை வார்த்துள்ளதே தவிர அதனை மஇகா ஒருபோதும் இழந்து விடாது என்று மஇகா 74ஆம் ஆண்டு பேராளர் மாநாட்டை தொடக்கி வைத்த பின்னர் செய்தியாளர் சந்திப்பில் டான்ஶ்ரீ விக்னேஸ்வரன் மேலும் சொன்னார்.

டத்தோஶ்ரீ சரவணனுக்கு அமைச்சர் பதவியை கொடுத்தது பிரதமர் முஹிடினே

ரா.தங்கமணி

கிள்ளான்-

மஇகாவின் தேசிய துணைத் தலைவர் டத்தோஶ்ரீ எம்.சரவணனுக்கு அமைச்சர் பதவியை கொடுத்தது பிரதமர் டான்ஶ்ரீ முஹிடின் யாசினே. தேசிய முன்னணி அமைச்சர் பதவிக்கு டத்தோஶ்ரீ சரவணனின் பெயரை பரிந்துரை கூட செய்யவில்லை என்று மஇகாவின் தேசியத் தலைவர் டான்ஶ்ரீ எஸ்.ஏ.விக்னேஸ்வரன் தெரிவித்தார்.

இன்று நடைபெற்ற மஇகாவின் 74ஆவது பொதுப் பேரவையில் பெரிக்காத்தான் நேஷனல் கூட்டணியின் தலைவரான டான்ஶ்ரீ முஹிடின் யாசின் இயங்கலை வழி உரையாற்றியது குறித்து எழுப்பப்பட்ட கேள்விக்கு பதிலளித்த டான்ஶ்ரீ விக்னேஸ்வரன்,  மஇகாவுக்கு  ஓர் அமைச்சர் பதவியை கொடுத்த டான்ஶ்ரீ முஹிடின் யாசினுக்கு நன்றி விசுவாசத்தை காட்டும் நோக்கிலேயே இந்த ஏற்பாடு செய்யப்பட்டது.

பக்காத்தான் ஹராப்பான் ஆட்சி கவிழ்க்கப்பட்டு பெரிக்காத்தான் நேஷனல் கூட்டணி அரசாங்கம் அமைந்தபோது அமைச்சரவையில் இடம்பெறுவோரின் தேமு பட்டியலில் மஇகாவின் ஒரே நாடாளுமன்ற உறுப்பினரான டத்தோஶ்ரீ சரவணனின் பெயர் இடம்பெறவில்லை.

ஆயினும் தமது அமைச்சரவையில் இந்தியர் பிரதிநிதித்துவம் இடம்பெறுவதை உறுதி செய்யும் வகையில் பிரதமர் டான்ஶ்ரீ முஹிடின் யாசின் சுய விருப்பத்தின் பேரிலே டத்தோஶ்ரீ சரவணனுக்கு அமைச்சர் பதவி கொடுக்கப்பட்டது. அதற்கு நன்றிக்கடனாகவே இன்றைய மாநாட்டில் பிரதமரின் சிறப்புரை இடம்பெற்றது என்று டான்ஶ்ரீ விக்னேஸ்வரன் மேலும் சொன்னார்.


10% தொகுதிகளை விட்டு கொடுக்க அம்னோ தயாரா? - டான்ஸ்ரீ விக்னேஸ்வரன் காட்டம்

ரா.தங்கமணி 

கிள்ளான் -

வரும் 15ஆவது பொதுத் தேர்தலில் தேசிய முன்னணி மீண்டும் ஆட்சி அதிகாரத்தை கைப்பற்ற தேமுவின் உறுப்புக் கட்சிகள் தங்களின் தொகுதிகளை விட்டுக் கொடுக்க வேண்டும் என்றால் அம்னோவும் விட்டுக் கொடுக்கும் போக்கை கடைபிடிக்க வேண்டும் என்று மஇகாவின் தேசியத் தலைவர் டான்ஶ்ரீ எஸ்.ஏ.விக்னேஸ்வரன் கூறினார்.

மஇகாவுக்கு இருப்பதே 9 நாடாளுமன்றத் தொகுதிகள் தான். அதிலும் 35 விழுக்காடு தொகுதிகளை விட்டுக் கொடுக்க வேண்டும் என்றால் அம்னோவும் குறைந்தது 10 விழுக்காடு தொகுதிகளை விட்டுக் கொடுக்க முனைய வேண்டும்.

அதை விடுத்து நாங்கள் மட்டுமே கொடுக்க வேண்டும் என்றால் எப்படி ஏற்றுக் கொள்ள முடியும்? கடந்த காலங்களில் தேமுவின் முடிவுக்கு கட்டுப்பட்டு சில முடிவுகளை மஇகா ஏற்றுக் கொண்டிருக்கலாம். ஆனால் தற்போதைய சூழலில் கண்மூடித்தனமாக அனைத்து விவகாரங்களையும் ஏற்றுக் கொண்டிருக்க முடியாது. இந்திய சமுதாயத்தின் பிரதான கட்சியாக விளங்கும் மஇகா, இந்திய சமுதாயத்தின் நலனுக்காக சில முடிவுகளை தீர ஆராய்ந்து எடுக்க தயாராகி உள்ளது.

அதற்கேற்ப தேமு கூட்டணியில் புதிய கட்சிகள் இடம்பெறும் சூழலில் தொகுதிகளை பகிர்ந்து கொள்ள வேண்டும் என்றால் மஇகா அதற்கு தயாராக உள்ளது. அதே வேளையில் அம்னோவும் தொகுதியை பகிர்ந்து கொள்வதற்கு தயாராக வேண்டும். 

9 நாடாளுமன்றத்  தொகுதிகளில் 35 விழுக்காடு தொகுதிகளை விட்டுக்  கொடுத்தால் வரும் தேர்தலில் 6 நாடாளுமன்றத் தொகுதிகளில் மட்டுமே போட்டியிடக்கூடும்.

அம்னோ மட்டும் தங்களது தொகுதிகளை தற்காத்து மஇகாவை தொகுதிகளை விட்டுக் கொடுக்கச் சொன்னால் எவ்வாறு ஏற்றுக் கொள்ள முடியும் என்று டான்ஶ்ரீ விக்னேஸ்வரன் வினவினார்.


Friday, 2 April 2021

அரசியல் மேடைகளாக ஆலயங்கள் உருமாறி விடக்கூடாது- கணபதிராவ் வலியுறுத்து

ரா.தங்கமணி 

ஷா ஆலம்-

இந்தியர்களின் நலனில் அக்கறை காட்டும் சிலாங்கூர் மாநில அரசு இந்து ஆலயங்களின் மேம்பாட்டிற்காக இவ்வாண்டு வெ. 2.14 மில்லியன் நிதியை ஒதுக்கீடு செய்துள்ளது என்று அம்மாநில ஆட்சிக்குழு உறுப்பினர் வீ. கணபதிராவ் தெரிவித்தார். 

கடந்த காலங்களில் வெ. 1 மில்லியன் நிதியும் பின்னர் வெ. 1.7 மில்லியன் நிதியும் வழங்கப்பட்டு வந்த நிலையில் இவ்வாண்டு வெ. 2.14 மில்லியன் வழங்கப்பட்டுள்ளது. 

ஆலயங்களின் மேம்பாட்டுக்காக வழங்கப்படும் இந்நிதியை கோபுரங்களை உயரே கட்டுவதில் மட்டும் கவனம் செலுத்தாமல் இந்திய சமூகத்தின் வளர்ச்சிக்கும் தனது பங்களிப்பை ஆலயங்கள் வழங்கிட வேண்டும். 

ஆலயங்கள் எப்போதும் சமய மையங்களாக விளங்கிட வேண்டுமே தவிர அரசியல் மேதைகளாக மாறிவிடக்கூடாது. 

யார், எவர்,  எந்த கட்சியை சேர்ந்தவர் என்ற பின்புலங்களை ஆராயாமல் அனைத்துத் தரப்பினருடனும் இணைந்து பணியாற்றும் பக்குவத்தை ஆலய நிர்வாகங்கள் ஏற்படுத்தி கொள்ள வேண்டும். 

அப்போதுதான் அனைத்துத் தரப்பினரையும் அரவணைத்துச் செல்லும் சமூக மையங்களாக ஆலயங்கள் திகழ்ந்திட முடியும் என்று இன்று சிலாங்கூர் மாநிலத்திலுள்ள ஆலயங்களுக்கு முதற்கட்டமாக மானியங்களை வழங்கும்  நிகழ்வில் உரையாற்றுகையில் கணபதிராவ் இவ்வாறு கூறினார். 

அதே வேளையில் கோவிட்-19 காலகட்டத்தில் வசதி குறைந்த மக்களுக்கு உணவுப் பொருட்களை வழங்கி தங்களது சமுதாய கடப்பாட்டை நிறைவு செய்த ஆலய நிர்வாகங்களுக்கு பாராட்டுகளை தெரிவித்துக் கொள்வதாக அவர் மேலும் சொன்னார். 

இந்நிகழ்வில் 68 ஆலயங்களுக்கு காசோலைகளை கணபதிராவ் எடுத்து வழங்கினார்.

Thursday, 1 April 2021

அம்னோ அமைச்சர்கள் பதவி விலகினால் அரசாங்கம் கவிழலாம்- லிம் கிட் சியாங்

 கோலாலம்பூர்-

நடப்பு அரசாங்கத்தில் இடம்பெற்றுள்ள அம்னோ உறுப்பினர்கள் அமைச்சரவையிலிருந்து பதவி விலகினால் பெரிக்காத்தான் நேஷனல் அரசாங்கம் கவிழும் என்று ஜசெகவின் மூத்தத் தலைவர் லிம் கிட் சியாங் கூறினார்.

பெர்சத்து கட்சியுடனான உறவை துண்டித்துக் கொள்வதாக அம்னோ பேரவையில் எடுக்கப்பட்ட முடிவுக்கேற்ப அம்னோ அமைச்சர்கள் பதவி விலகலாம் என எதிர்பார்க்கப்பட்ட வேளையில் அம்னோ அமைச்சர்கள் பதவி விலக வேண்டிய அவசியமில்லை என்று பிரதமர் முஹிடின் யாசின் கூறியிருந்தார்.

இது குறித்து கருத்து தெரிவித்த லிம், அரசாங்கம் கவிழக்கூடும் என்பதாலேயே அம்னோ அமைச்சர்கள் பதவி விலக வேண்டியதில்லை என்று முஹிடின் அறிவுறுத்தியுள்ளதாக மேலும் சொன்னார்.

Wednesday, 31 March 2021

சுங்கை சிப்புட் தொகுதியை கோருவதா? மணிமாறன் ஆவேசம்

ரா.தங்கமணி 

சுங்கை சிப்புட் -

சுங்கை சிப்புட் நாடாளுமன்றத் தொகுதியை அம்னோவுக்கு விட்டுக் கொடுக்க வேணடும் என்ற. அம்னோ புத்ரி பிரிவின் கோரிக்கை அறிவிலித்தனமானது எனபதோடு அதனை சுங்கை சிப்புட் தொகுதி மஇகா கடுமையாக கருதுவதாகவும் அதன் செயலாளர் கி.மணிமாறன் தெரிவித்தார்.

சுங்கை சிப்புட் நாடாளுமன்றத் தொகுதி மஇகாவின் பாரம்பரியத் தொகுதியாகும். மஇகாவின் முன்னாள் தலைவர்களான துன் வீ.தி. சம்பந்தன், துன் ச. சாமிவேலு ஆகியோர் இத்தொகுதியின் நாடாளுமன்ற உறுப்பிர்களாக பதவி வகித்து உள்ளனர்.

தற்போது இத்தொகுதியை மஇகா மீண்டும் மீட்டெடுப்பதற்கு ஏதுவாக மஇகாவின் தேசியத் தலைவர் டான்ஸ்ரீ எஸ்.ஏ.விக்னேஸ்வரனே நேரடி களத்தில் இறங்கியுள்ளார். அதுமட்டுமல்லாது இத்தொகுதியின் வேட்பாளர் நான் தான் என்பதை பலமுறை கூறியுள்ளார்.

நிலைமை இவ்வாறிருக்க அமனோவின் கோரிக்கை தேமுவின் உறுப்புக் கட்சிகளான அம்னோ- மஇகா இடையேயான நல்லுறவை பாதிக்கச் செய்யலாம்.

இவ்விவகாரம் குறித்து சுங்கை சிப்புட் தேமு தலைவர் டத்தோ சூல்கிப்ளியிடம் விளக்கம் பெற்றதாக கூறிய சுங்கை சிப்புட் தேமு செயலவை உறுப்பினருமான மணிமாறன், தொகுதி தேமு கூட்டத்தில் இவ்விவகாரம் குறித்து விவாதிக்கப்படும் என்றும் தெரிவித்தார்.

Tuesday, 30 March 2021

சுங்கை சிப்புட் தொகுதியை விட்டுக் கொடுங்கள் - அம்னோ புத்ரி கோரிக்கை

சுங்கை சிப்புட்-

மஇகாவின் பாரம்பரியத் தொகுதியான சுங்கை சிப்புட் நாடாளுமன்றத் தொகுதியை அம்னோவுக்கு விட்டுக் கொடுக்கும்படி கோரிக்கை விடுக்கப்பட்டுள்ளது.

கடந்த மூன்று தவணைகளாக சுங்கை சிப்புட் நாடாளுமன்றத் தொகுதியில் தோல்வி கண்டுள்ள மஇகா, வரும் 15ஆவது பொதுத் தேர்தலில் அத்தொகுதியை அம்னோவுக்கு விட்டுக் கொடுக்கும்படி சுங்கை சிப்புட்  அம்னோ புத்ரி  பிரிவுத் தலைவி நோராசுரா அப்துல் கரீம்  கோரிக்கை விடுத்துள்ளார்.

மஇகாவின் முன்னாள் தேசியத் தலைவர்களான துன் வீ.தி.சம்பந்தன், துன் ச.சாமிவேலு ஆகியோர் நாடாளுமன்ற உறுப்பினர்களாக பதவி வகித்த இத்தொகுதி 2008ஆம் ஆண்டு முதல் எதிர்க்கட்சி வசமாகியுள்ளது.

2008 முதல் 2018 ஆம் ஆண்டு வரை டாக்டர் மைக்கல் ஜெயகுமாரும் 2018 முதல் எஸ்.கேசவனும் இத்தொகுதியின் நாடாளுமன்ற உறுப்பினராக பதவி வகித்தனர்.

Sunday, 28 March 2021

சித்திரையே தமிழ் புத்தாண்டு- மலேசிய இந்து இளைஞர் பேரவை உறுதி

கோலாலம்பூர்-

அண்மையில் நாட்டில் பொங்கல் விழா, தமிழ்ப்புத்தாண்டு, பள்ளிகளில் இறை மறுப்புக் கொள்கை திணிப்புக் குறித்து ஏற்பட்டுள்ள சர்ச்சைகள் மிகவும் வருத்தமளிக்கின்றன என்று மலேசிய இந்து இளைஞர் பேரவை தெரிவித்துள்ளது. இது தொடர்பாக பலரால் ஊடகங்களில் செய்யப்பட்ட அறிவிப்புகளாலும் அவற்றால் எழுந்துள்ள கருத்து மோதல்களாலும் இந்த நாட்டில் உள்ள இந்தியர்கள் குழப்பமும் வருத்தமும் அடைந்துள்ளனர். இந்தச் சர்ச்சைகளைக் குறித்து மலேசிய இந்து இளைஞர் பேரவையின் நிலைப்பாட்டைத் தெரிவித்துள்ளது.


தமிழர் மரபில் நல்ல விளைச்சலைத் தந்த இறை ஆற்றலுக்கு நன்றி கூறும் வகையில் கொண்டாடப்படும் பொங்கல் விழா சமயத்தோடு இரண்டறக் கலந்த  விழாவே ஆகும். நம் சமயத்தில் சாஸ்திரங்கள்படி ஒரு செயலைத் தொடங்கும் முன் நல்ல நேரத்தைப் பார்ப்பது வழக்கம். அதே போல், பொங்கல் நம் சமயம் சார்ந்த விழா என்பதால் பொங்கல் வைக்க தகுந்த நேரத்தைப் பார்த்துப் பொங்கல் வைக்கிறோம். அதுமட்டுமின்றி, பொங்கல் விழாவை 4 நாட்கள் விமரியாசையாகக் கொண்டாடும் நாம், பொங்களுக்கு முதல் நாளில் பழைய பொருட்களை எரித்துப் போகிப் பண்டிகையாகக் கொண்டாடுகிறோம். 

ஆனால், தொடக்க காலத்தில் பயிர்கள் செழிக்க மழையைத் தந்த மருத நில தெய்வமான இந்திரனுக்கு நன்றி சொல்வதற்காகப் பூஜைகள் செய்து கொண்டாடப்பட்டது.  நாளடைவில் இப்பண்டிகை மக்களால் மறைக்கப்பட்டுப் பழைய பொருட்களை மட்டும் எரிக்கின்ற விழாவாக மாறியுள்ளது. தை முதல் நாளில் கொண்டாடப்படும் சூரிய பொங்கலில், பயிர்கள் செழித்து வளர ஒளியைத் தந்த சூரிய தேவனுக்கு மக்கள் தாங்கள் அறுவடை செய்த புது நெல்லிலிருந்து பெறப்பட்ட அரிசியைக் கொண்டு பொங்கலிட்டுப் படைப்பார். பொங்களின் இரண்டாம் நாள், உழவரோடு வயலை உழுவதோடு பாலையும் தந்து வாழ்வளிக்கும் பசுக்களுக்கு நன்றி செலுத்தும் வகையில் கோமாதா பூஜை செய்து மாட்டுப் பொங்கலைக் கொண்டடுகிறோம். 

தொடர்ந்து, பொங்கலின் 3வது நாளான கன்னிப் பொங்கலில் அல்லது காணும் பொங்கலில் தங்களுக்கு நல்ல கண்வன் அமைய வேண்டும் என பெண்கள் கார்த்தியாயணி தேவியை வேண்டி விரதமிருந்து பறவைகளுக்கு உணவைத் தானமாகக் தருவார்கள். இவ்வாறு பொங்கல் விழா நான்கு நாட்களாக இறைவனுக்கும் இயற்கைக்கும் நன்றி சொல்லும் வகையில் கொண்டாடப்படுகிறது. இதிலிருந்து பொங்கல் சமயம் சார்ந்த விழாதான் என்று தெளிவாகத் தெரிகிறது. எனவே, பொங்கல் சமய விழாவா அல்லது பண்பாட்டு விழாவா என்பதில் சந்தேகம் கொள்ளவேண்டாம். பொங்கல் சமய விழாதான் என்று மலேசிய இந்து இளைஞர் பேரவை திட்டவட்டமாகக் கூறிக்கொள்வதாக அதன் தலைவர் அருண்குமார் செங்கோடன் தெரிவித்தார்.

தொடர்ந்து, தமிழ்ப்புத்தாண்டு சித்திரையிலா அல்லது தையிலா எனும் கேள்வியும் தற்போது எழுந்துள்ளது. தமிழர்கள் பூமியின் மையக் கோட்டில் சூரிய ஒளி படும் நிலையிலிருந்து (equinox) வடக்கு நோக்கிச் செல்வதையும் பின்னர் தெற்கு நோக்கிச் செல்வதையும் வைத்தே ஆறு பருவங்களை நிர்ணயித்தனர்.  ஆறு பருவங்களுள் முதல் பருவமாகச் சித்திரையில் வரும் இளவேனில் பருவத்தில்தான் தான் இலைகள் துளிர் விடும், காய்கள் காய்க்கும் இதைப் புதிய தொடக்கத்தின் வெளிப்பாடாகப் பார்த்த அன்றைய தமிழர்கள் சித்திரை முதல் நாளேயே தமிழ்ப்புத்தாண்டாக கொண்டாடி வந்தனர். 

ஜோதிடத்திலும். சூரியன் மேஷ இராசியில் பயணம் செய்யும் போது நடைபெறும் மாதம் சித்திரையாகும். சித்திரையில் பிறக்கின்ற மேஷம் தான் இராசிகளில் முதலாவதாக இருக்கிறது என்பதும் இங்குக் குறிப்பிடத்தக்கது. இதையடுத்து சங்கத் தமிழ் இலக்கியத் தொகுப்பான பத்துப்பாட்டு நூல்களுள் ஒன்றான நெடுநல்வாடையில் வரும் “திண்ணிலை மருப்பின் ஆடுதலை யாகவிண்ணூர்பு திரிதரும் வீங்குசெல்ல மண்டிலத்து” எனும் வரிகள் முதல் இராசியான மேஷ இரசியில்  சூரியன் நுழைவதே சித்திரை ஒன்று என்பதற்கான சான்றாகும். பாரதிதாசன் சொன்னதாகக் கூறப்படும் ‘நித்திரையில் இருக்கும் தமிழா சித்திரையல்ல உனக்குத் தமிழ்ப்புத்தாண்டு’ எனும் கவிதை வரிகள் அடங்கியுள்ள முழுப்பாடல் பாரதிதாசன் எந்தக் கவிதை தொகுதிகளிலும் காணக் கிடைக்கவில்லை. அப்படி இருக்கையில் பாரதிதாசன் கூறியதாகச் சொல்வது எவ்வாறு சாத்தியமாகும். 

ஆகவே, நம் முன்னோர்களான பழந்தமிழர் கணித்த வானியல் அடிப்படையிலான ஆண்டின் தொடக்கமான சித்திரை ஒன்று தான் தமிழ்ப்புத்தாண்டு என்பது தெளிவாகிறது.

மேலும், நாட்டிலுள்ள பல தமிழ்ப்பள்ளி நூலகங்களுக்கு இறைமறுப்புக் கொள்கைகள் அடங்கிய நூல்களை அன்பளிப்புச் செய்து அக்கொள்கையை மாணவர்களிடையே திணிப்பது கண்டனத்துக்குரியது. இதன் வழி ஆரம்ப பள்ளிகளிலும் உயர்கல்விக்கூடங்களிலும் இறைமறுப்பு கொள்கைகள் பரவி இருப்பது மிகவும் வருத்தமளிக்கிறது. இது மிகவும் கண்டிக்கத்தக்கது.  இவ்வாறான நடவடிக்கை மலேசிய அரசியல் அமைப்புச் சட்டத்திற்குப் புறம்பான ஒரு செயலாகும். இறைவன் மீது நம்பிக்கை வைத்தல் எனும் தேசிய கோட்பாட்டை முன்னிறுத்தி நம் நாடு இயங்குகிறது. 

அதோடு தேசிய கல்வித் தத்துவத்தில் குறிப்பிடப்பட்டிருப்பது போல மலேசிய கல்வியானது இறைநம்பிக்கை, இறைவழி நிற்றல் எனும் அடிப்படையில்தான் செயல்படுகிறது. இந்த தேசிய கல்வித் தத்துவத்தின் அடிப்படையில் உருவாகும் மாணவர்கள், அறிவாற்றல், ஆன்மிகம், உள்ளம், உடல் ஆகிய கூறுகளில் சமன்நிலையும் இயைபும் பெற்ற மாந்தனாகத் திகழ்வர் என்பதே திண்ணம். கல்விக்கூடகங்களில் மட்டுமல்லாது தற்போது சமூக ஊடகங்களும் இறைமறுப்புக் கொள்கையைப் பறைசாற்றி வருகின்றன. 

உலகின் மூத்த சமயங்களுள் முன்மாதிரியாக திகழ்வது இந்து சமயமே. இறை நம்பிக்கையிலும் வழிப்பாட்டு முறையிலும் பிறருக்கு எடுத்துக்காட்டாக இருக்கும் நம்மிடையே இறை நம்பிக்கையை இழிவு செய்யும் ஊடுருவல் ஆலமரத்தை விஷம் வைத்து கொல்வதற்குச் சமமாகும். எப்படி ஆலமரத்திற்கு வைக்கப்பட்ட விஷம் சிறுக சிறுக வேரிலிருந்து கிளை, பூ, பழம் என்று எல்லாப் பகுதிகளுக்கும் பரவி ஆலமரத்தைச் சாய்த்து விடுகிறதோ அதே போல் இந்த இறைமறுப்புக் கொள்கை சிறுக சிறுக இந்துக்களிடையே பரவி சமய அடையாளத்தையே அழித்துவிடும். இறைமறுப்புக் கொள்கை பரப்புரையாளர்கள் இவ்வாறான செயல்களைத் தவிர்த்துவிடுமாறு மலேசிய இந்து இளைஞர் பேரவை எச்சரிக்கிறது.

நம்மிடையே ஏற்படும் மொழி, சமயம், சமூகம் குறித்த கருத்து வேறுபாடுகளைத் தீர்க்க நாம் அனைவரும் ஒன்றுகூடி தனித்து கலந்தாலோசிக்க வேண்டும் என மலேசிய இந்து இளைஞர் பேரவை வலியுறுத்துகிறது. முகநூலில் பதிவு செய்வதாலும் காணொலி வழி பொது ஊடகங்களில் கருத்துக்களைப் பரவச் செய்வதாலும் பிற இனத்தவரால் நாம் எள்ளி நகையாடப்படுவோம். நம்மிடையே ஒற்றுமை இல்லாத போது நம் இனத்தவரின் நலனுக்காகக் கேள்வி கேட்பதும் குரல் எழுப்புவதும் முயல் கொம்பே.

எனவே, இந்திய இளைஞர்களைச் சமூக வளச்சியாளர்களாக உருமாற்ற அனைவரும் ஒன்றாக செயல்படுவோம். நம் இனத்தவரின் ஒற்றுமையே… நம் பலம் என்று  அருண்குமார் வெளியிட்ட அறிக்கையில் கூறியுள்ளார்.

Thursday, 18 March 2021

பேரம் பேசப்பட்ட எம்பி-க்கள் வாய் மூடி கிடந்தது ஏன்?

 ரா.தங்கமணி

கோலாலம்பூர்-

பெரிக்காத்தான் நேஷனல் அரசாங்கத்திற்கு ஆதரவு அளிக்கும்படி நெருக்குதல் கொடுக்கப்பட்டதாக பிகேஆர் கட்சியின் தலைவர் டத்தோஶ்ரீ அன்வார் இப்ராஹிம் கூறிய குற்றச்சாட்டு தொடர்பில் சம்பந்தப்பட்ட நாடாளுமன்ற உறுப்பினர்கள் வாய் திறக்காதது ஏன்? என்ற கேள்வி எழுந்துள்ளது.

கடந்த 14ஆவது பொதுத் தேர்தலின்போது புத்ராஜெயாவை கைப்பற்றிய பக்காத்தான் ஹராப்பான் கூட்டணி அரசாங்கத்தின் ஆட்சி கடந்தாண்டு பிப்ரவரி மாதம் கவிழ்க்கப்பட்டது. அதன் பின்னர் பெரிக்காத்தான் நேஷனல் எனப்படும் பெர்சத்து, தேசிய முன்னணி, பாஸ் ஆகியவற்றின் கூட்டணியிலான அரசாங்கம் அமைக்கப்பட்டது.

சில மாதங்களுக்கு முன்பு பெரிக்காத்தான் நேஷனல அரசாங்கத்திற்கான ஆதரவை மீட்டுக் கொள்வதாக சில அம்னோ தலைவர்கள் கூறியிருந்த நிலையில் பெரிக்காத்தான் நேஷனல் கூட்டணியின் பெரும்பான்மை கேள்விக்குறியாக்கப்பட்டது.

நாடாளுமன்றத்தில் தனது பெரும்பான்மை நிரூபிக்க வேண்டிய கட்டாயத்தில் உள்ள பெரிக்காத்தான் நேஷனல் அரசு, சில நாடாளுமன்ற உறுப்பினர்களை மிரட்டுவதாகவும் பேரம் பேசப்படுவதாகவும் கூறப்பட்டு வந்தது.

பிகேஆர் கட்சியின் உதவித் தலைவராக பதவி வகித்த டாக்டர் சேவியர் ஜெயகுமார் மீது ஊழல் குற்றச்சாட்டு சுமத்தப்பட்டு வந்த நிலையில் அண்மையில் பிகேஆரில் இருந்து விலகி பிரதமர் முஹிடின் யாசின் தலைமையிலான பெரிக்காத்தான் நேஷனல் அரசாங்கத்திற்கு ஆதரவு கொடுப்பதாக கூறியிருந்தது அரசியல் வட்டாரத்தில் பரபரப்பான நிலையில் அந்த குற்றச்சாட்டுகளும் உண்மையாக இருக்கலாம் என்ற ஆருடமும் வலுத்து வந்தது.

இந்நிலையில் நேற்று முன்தினம் செய்தியாளர்களிடம் சந்தித்த டத்தோஶ்ரீ அன்வார், 5,6 எதிர்க்கட்சி எம்பி-க்கள் பெரிக்காத்தான் நேஷனல் அரசாங்கத்திற்கு ஆதரவு கொடுக்க பேரம் பேசப்படுவதாகவும் நெருக்குதல் கொடுக்கப்படுவதாகவும் குற்றஞ்சாட்டினார்.

உண்மையில் எதிர்க்க்கட்சி நாடாளுமன்ற உறுப்பினர்கள் ‘பேரம்’ பேசப்பட்டார்கள் என்றால் ஏன் அது குறித்து அவர்கள் வாய் திறக்கவில்லை?, மக்கள் பிரதிநிதிகளான நாடாளுமன்ற உறுப்பினர்களுக்கே மற்றொருவர்தான் வாய் திறக்க வேண்டுமானால் இத்தகைய நாடாளுமன்ற உறுப்பினர்களா மக்களுக்காக குரல் கொடுப்பார்கள்? எனும் கேள்வி எழுந்துள்ளது.

தவறு நடப்பது தெரிந்தால் அதற்காக குரல் கொடுக்க வேண்டிய மக்கள் பிரதிநிதிகளே தங்களுக்கு எதிராக நடத்தப்படும் அநீதிக்கு குரல் கொடுக்காமல்ல் போனால் சாமானிய மக்களின் நிலை என்னவாவது?


Tuesday, 16 March 2021

பிகேஆருடன் அம்னோ ஒத்துழைப்பு?- தகவலை வெளியிடுகிறாரா அன்வார்?

 கோலாலம்பூர்-

வரும் 15ஆவது பொதுத் தேர்தலில் அம்னோவுடன் ஒத்துழைப்பது தொடர்பான தகவலை பிகேஆர் கட்சியின் தலைவர் டத்தோஶ்ரீ அன்வார் இப்ராஹிம் இன்று  வெளியிடுவார் என்று எதிர்பார்க்கப்படுகிறது.


பெர்சத்து கட்சியின் மீது அம்னோவும் பிகேஆரும் அதிருப்தி கொண்டுள்ள நிலையில் வரும் தேர்தலில் பெர்சத்து ஓரம்கட்ட இவ்விரு கட்சிகளும் முடிவெடுத்துள்ளன.

அதன் அடிப்படையில் இவ்விரு கட்சிகளும் ஒன்றிணைந்து பொதுத் தேர்தலை எதிர்கொள்ள ஆயுத்தமாகி வருவதாக ஆருடங்கள் வலுத்து வருகின்றன.

இன்று 4.30 மணியளவில் டத்தோஶ்ரீ அன்வார் வெளியிடும் தகவல் மலேசிய அரசியல் பிரளயத்தை ஏற்படுத்துமா?


அம்னோ தலைவருக்கு மஇகா நெருக்குதலா?; உண்மையில்லை- டான்ஶ்ரீ விக்னேஸ்வரன்

ரா.தங்கமணி

கோலாலம்பூர்- 

அம்னோ தலைமைத்துவத்தில் மாற்றத்தை ஏற்படுத்தும் வகையில் அதன் தலைவர் டத்தோஶ்ரீ ஸாயிட் ஜமிடி  பதவி விலக மஇகா நெருக்குதல் அளிப்பதாக வெளியான தகவல் உண்மையில்லை என்று மஇகா தேசியத் தலைவர் டான்ஶ்ரீ எஸ்.ஏ.விக்னேஸ்வரன் குறிப்பிட்டார்.


அம்னோவின் உட்கட்சி விவகாரங்களில் மஇகா என்றுமே தலையிட்டது கிடையாது. அம்னோவின் தலைவர் யார் என்பதை அக்கட்சியின் பேராளர்களும் உறுப்பினர்களுமே முடிவே செய்ய வேண்டுமே தவிர மஇகா அல்ல.

அம்னோவின் தலைவராக யார் வந்தாலும் மஇகா அவரை ஏற்றுக் கொள்ளும். அம்னோவுக்கும் மஇகாவுக்கும் 60 ஆண்டுகால நட்புறவு நீடித்து வருகிறது. அம்னோவுக்கு புதிய தலைவர் வேண்டுமா? வேண்டாமா? அக்கட்சியே முடிவு செய்யட்டும் என்று அவர் மேலும் சொன்னார்.

பெரிக்காதான் நேஷனலுக்கு ஆதரவு; தேமுவை கைவிட மாட்டோம்- மஇகா உறுதி

கோ.பத்மஜோதி

கோலாலம்பூர்- 

பெரிக்காத்தான் நேஷனல் அரசாங்கத்திற்கு ஆதரவு வழங்கினாலும் தேசிய முன்னணியை ஒருபோதும் மஇகா கைவிடாது என்று அதன் தேசியத் தலைவர் டான்ஶ்ரீ எஸ்.ஏ.விக்னேஸ்வரன் தெரிவித்தார்.

நடப்பு அரசாங்கத்தில் இடம்பெற்றுள்ள அம்னோ, வரும் பொதுத் தேர்தலில் பெர்சத்து கட்சியை ஆதரிக்காது என்று கூறப்பட்டுள்ள நிலையில் மஇகா நடப்பு அரசாங்கத்திற்கு தொடர்ந்து ஆதரவளிக்கும்.

நடப்பு அரசாங்கத்தில் மஇகா துணைத் தலைவர் அமைச்சராக பதவி வகிக்கிறார். அத்தகைய சூழலில் நடப்பு அரசாங்கத்திற்கு எவ்வாறு ஆதரவு அளிக்காமல் இருக்க முடியும்?

பதவி மட்டும் வேண்டும். ஆனால் ஆதரவு அளிக்கக்கூடாதா? என்று நேற்று நடைபெற்ற மஇகா மத்திய செயலவை உறுப்பினர் கூட்டத்திற்குப் பின்னர் செய்தியாளர்களிடம் பேசுகையில் டான்ஶ்ரீ விக்னேஸ்வரன் குறிப்பிட்டார்.

பேரா மந்திரி பெசாரின் சிறப்பு செயலாளராக டத்தோ இளங்கோ நியமனம்

 ரா.தங்கமணி

ஈப்போ-

பேரா மாநில மந்திரி பெசாரின் சிறப்பு செயலாளராக பேரா மஇகா தலைவர் டத்தோ வ.இளங்கோ நியமனம் செய்யப்பட்டுள்ளார்.

பக்காத்தான் ஹராப்பான் கூட்டணி ஆட்சி கவிழ்ந்து பெரிக்காத்தான் நேஷனல் அரசாங்கம் பேரா மாநிலத்தில் ஆட்சி அமைத்தபோது இந்தியர்களுக்கான நியமனப் பதவி குறித்த எதிர்பார்ப்பு நிலவியது.

பெரிக்காத்தான் நேஷனல் கூட்டணியில் தேசிய முன்னணி அங்கம் வகிப்பதால் அதில் இடம்பெற்றுள்ள மஇகாவுக்கு ஏதேனும் பதவிகள் வழங்கப்படும் என எதிர்பார்க்கப்பட்டது.

ஆயினும் அனறைய மாநில மந்திரி பெசார் டத்தோ அஹ்மாட் பைசால் அஸுமு மஇகாவை  ஓரங்கட்டி வந்த நிலையில் இந்தியர்களுக்கு நானே பிரதிநிதி, அவர்களின் பிரச்சினையை நேரடியாக நானே கவனிப்பேன் என்று அறிக்கை விடுத்தார்.

இதனிடையே, டத்தோ பைசால் அஸுமு மந்திரி பெசார் பதவியிலிருந்து வீழ்த்தப்பட்ட பின்னர் பேரா மாநில அம்னோ தலைவர் டத்தோ சரானி முகமட் புதிய மந்திரி பெசாராக பதவியேற்றப் பின்னர் ம இகாவுக்கு நியமனப் பதவி வழங்கப்படும் என்று கணிக்கப்பட்டது.

அதன்படி, டத்தோ இளங்கோவை சிறப்பு செயலாளராக நியமனம் செய்துள்ளார் டத்தோ சரானி.

இந்த நியமனப் பதவி பேரா  மஇகாவுக்கு  புது தெம்பை அளிப்பதாகவும் இந்திய சமுதாயத்திற்கு சேவையாற்ற  மஇகாவுக்கு வாய்ப்பளிக்கப்பட்டுள்ளதாகவும் கருதப்படுகிறது.